萬聖節點解要扮鬼 南瓜燈籠只係代替品？

講到萬聖節，就要由11月1號 -“諸聖節”開始講起，天主教會將生前具有超高德行的信徒封為聖人。但其實具有非凡德行嘅信徒有好多，但唔少都係冇乜人識嘅小人物，所以呢日除咗紀念被冊封嘅聖人，仲記念所有應該被冊封但未被封聖嘅信徒。

而10月31號 - 萬聖節 。Halloween呢個字係由 All Hallows Eve (Hallows 指聖人 )而嚟，原本係指諸聖節前一天嘅意思。

凱爾特人（住喺不列顛地區嘅原住民）好早就視10月31號為重要日子。呢日係佢哋一個叫做Samhain嘅節日，但呢日同基督宗教無關。凱爾特人認為呢一日係天氣開始變凍嘅日子，覺得呢晚活人嘅世界同死人世界嘅界線變得模糊，死亡神靈Samhain會帶領鬼魂喺人間搵替身。所以大家會扮鬼扮馬希望呃到Samhain同街上嘅鬼魂。

至於今日萬聖節嘅象徵之一 - 南瓜，就同愛爾蘭一個傳說有關，相傳有一位叫Jack嘅人有日飲醉之後同撒旦開玩笑，氹咗撒旦上樹仲刻咗個十字架，撒旦因為咁落唔返嚟，就接受阿Jack嘅條件，畀佢唔洗落地獄。

但唔洗落地獄之餘，阿Jack亦上唔到天堂。撒旦就畀咗一個由空心大頭菜整嘅燈籠佢喺黑暗嘅世界照明。所以愛爾蘭人慶祝萬聖節嗰陣都會揸住呢種燈籠。不過後嚟佢哋發現南瓜比大頭菜更適合做燈籠，所以轉用南瓜代替。