成日話一個人旅行幾正幾正。係好正，但其實都有唔少負面情緒可能會出現。而呢啲負面情緒，其實都可以為我哋帶嚟正面嘅影響。
孤獨
一個人旅行雖然預咗係一個人，但無論幾有心理準備都好，時間耐咗，有時難免孤獨。
尤其係去到一啲靚景嘅地方，可能會覺得「點解得自己一個睇呢」？
但係正因為一個人，我哋先有更多時間同空間同自己對話，進一步了解自己。同時因為孤獨，我哋知道身邊人嘅重要，返去要更珍惜身邊人！
恐懼
一個人旅行，突發嘅事隨時都可以出現。好似miss咗班車、唔見咗行李、甚至遇到壞人，都咪話唔驚。
但係某一啲恐懼，如果功課做足啲，萬事小心啲係可以避免或者減低的。而面對一啲難以避免嘅恐懼，就好睇我哋如何應變了。而當你成功解決到難題，嗰種成功感係冇嘢媲美到的
疲累
一個人旅行，由plan行程、搵住宿、搵交通等等，全部都一腳踢。長嘅旅程嘅話，自己處理晒所有嘢，都真係會好攰。
但一腳踢處理所有嘢係好chur，但可能咁你先知道，自己原來可以咁multitask。而旅程後你會發現，你經歷緊嘅係好難得嘅體驗，你甚至可能會掛住呢種咁Chur嘅過程。
Comments