每個人心目中都有一個人生check list，上面的目標大概可分為兩類，一是買樓買車等現實型；二是環遊世界、一個人流浪等理想（發夢）型。很多人都會窮半生努力去達成第一類目標，而另一類夢想則大都被現實沖涮殆盡，終成為總結人生時的一個遺憾。而屬於行動派的Tommy就決定化夢想為現實，在疫情間隻身出走至泰國布吉Workacation（在異地遙距工作）兩個月，「有啲嘢決定咗就要做，猶豫都係嘥時間」Tommy說。
香港的第五波疫情令所有人都人心惶惶，人人都巴不得躲於密封的隔離箱。Tommy居然在這非常時期離開家鄉， 一個人跑到布吉展開長達兩個月的Workcation。 「既然我工作有咁嘅自由度，我覺得點都要去下新嘅地方體驗。有啲嘢期待下人生先有啲衝擊、有動力去工作，同埋做人生想做嘅嘢。」由決定出走， 到辦妥所有手續登上飛機，Tommy只花了兩個星期。
泰國的防疫入境限制，自去年起一再放寬。去年底推出「沙盒計劃」，開放布吉予已接種疫苗的旅客入境。後來更一步步放寬限制，推出「Thailand Pass」等方案，讓更多國際旅客更容易入境。
Tommy今年三月入境泰國時，就是循Thailand Pass渠道入境。他形容入境程序非常簡單，只要預先填妥接種疫苗的資料，到埗後再做一次檢測，並於酒店隔離一晚後，就可以自由行，及至行程第五天再上傳快測結果，即完成整個檢疫流程。「我幾欣賞泰國好有條理，一步步放寛（入境限制）」他說。（註：並非最新的泰國入境要求）
嘆絕佳住宿 享絕美景色
泰國眾多城市之中，鍾情陽光與海灘的Tommy毫不猶疑選擇布吉。到埗後，當地優美的景色及寫意的生活果然沒有令Tommy失望。「我揀咗一間有大露台嘅AirBnb，每日起身打開窗簾就係綠油油嘅景色，望遠少少又睇到海。做嘢期間又可以出露台，沖杯咖啡提一提神。」如此美好的居住環境，每月租金只是2000多港元。平常下班後，他不時又會走大約5至10分鐘路程到沙灘「買個椰青，打開沙灘氈，Chill住睇日落」。
而周末或假期，更是Tommy深度遊覽布吉的時候。在Workcation期間，適逢香港的復活節長假期，本身是潛水發燒友的他參加了一個4日3夜的「船上潛水團」，他形容是一個非常難忘的經歷。「我哋去咗北邊一個好靚好靚嘅地方，其中一個潛點嘅海洋生物多到好似海底花園咁，可以俾唔同嘅海洋生物包圍。一群一群唔同顏色，有大有細嘅魚喺你身邊游走，又有好多珊瑚，真係要置身喺嗰到先感覺到當刻嘅感覺，個個上到嚟都真係無言。」
玩水之餘，當然也有遊山。Tommy憶述在距離布吉個多小時的攀牙，有一個景色十分醉人，名為Samet Nangshe Viewpoint的景點。「佢係一個睇日落同睇山水好靚嘅位，有少少似桂林，即係喺個海到，無啦啦突出嚟好尖好高一舊舊奇形怪狀嘅山，嗰個位高咗上去，所以望落去好靚。」
追尋工作自由絕非一人
一趟旅程玩樂之外，與人的交流可能更為重要。兩個月的過程中，Tommy認識了不同國籍、不同背景，但同樣走到這世外桃源追尋自由工作環境的人。「我遇到一啲做trading嘅後生仔，唔搵full time job，自己出嚟做股票trading，周遊列國咁呢到去三個月嗰到去三個月。」
出走找尋更自在的生活並非年輕人的專利，Tommy在布吉認識了不少在當地「嘆世界」的退休人士，「佢哋畀咗好多意見我，睇下點早啲為自己嘅財政做打算，唔好去到四五十歲先諗退休生活係點，喺一個咁休閒嘅島退休，物價又唔係高，又有陽光海灘，好多唔同嘅嘢做，係幾多姿多彩。」
原來「飲住椰青睇日落」已經好滿足
Wrok from Thailand的時間經已結束，Tommy自言這兩個月的得著甚大，「我覺得自己對人生想要啲咩係清晰咗，以前你會想住大屋，或者要幾多個工人。經歷完自己喺外地生活，會發覺原來簡單嘅生活都係適合自己，原來我飲住個椰青睇住個日落已經係一件好滿足嘅事；我去潛水識到好多外國朋友，又係一件好滿足嘅事，唔需要話要擁有好多嘢。」
他認為香港人的價值觀以金錢，物質為重，或許難以明白簡單生活之美，「我覺得香港人喺好多層面都比較驚青同保守，我哋唔會做啲好大風險嘅嘢。好似我嘅經歷，問返其他國家嘅人，佢哋會覺得冇乜嘢，好平常啫，但對某啲香港人覺得『咁樣唔得』，一定要有喺某個規範內生活，我覺得未必嘅。」他鼓勵工作有一定自由度的港人也踏出一步，嘗試這個新的生活方式，不一定要被傳統工作模式規範。
所謂Workcation，只是人不在辦公室，甚至不在香港，但絕不代表偷懶不工作。Tommy強調，工作時間他會一心一意投入工作。工作模式有很多種，人生同樣有著千萬種可能，誰說人生Check list中的現實型和理想（發夢）型目標必定是二擇其一的選項？
Comments